Во организација на Лајонс клуб од Прилеп, прилепската организација на Црвен крст и дневниот центар „Ѕуница“, денеска пред Градскиот часовник се одржа хуманитарен настан посветен на децата од дневниот центар. Настанот е насловен „Велигденско дрвце на желби“.
„Организираме настан ‘Велигденско дрвце на желби’, што е изработено од децата од дневниот центар „Ѕуница“ и на секое велигденско јајце е напишано името на детето со посебни потреби и неговата желба. Секој граѓанин што сака може да биде хуман, може да ја исполни желбата на децата од дневниот центар, ако земе велигденско јајце на желбите и го купи подарокот за детето“, посочи Снежана Соколоска, претседател на Лајонс клубот од Прилеп.
Акцијата ја поддржа и директорот на Меѓуопштинскиот центар за социјални работи,Живко Силјаноски.
„Ја поздравувам оваа хуманитарна акција, вакви иницијативи се секогаш добредојдени“, рече директорот Силјаноски.
