Во Прилеп одбележан Меѓународниот ден за борба против сида

Со предавање во училиштата и делење пропаганден материјал и презервативи денеска Центарот за јавно здравје (ЦЈЗ) од Прилеп во соработка со Црвен крст го одбележаа Меѓународниот ден за борба против сида.

„Во Македонија секој оној кој што е инфициран од ХИВ/СИДА има пристап до антивирусната терапија,што ја има во доволни количества. Целта на нашите едукации е да се укаже на раното откривање на ХИВ инфекцијата и значењето на тестирањето во таа смисла. Што побрзо се направи тестирањето, во порана фаза на инфекцијата, кога сеуште имунитетот на заразениот е зачуван, тогаш поголем ќе биде ефектот од лекувањето. Затоа инсистираме болеста да се открие во што е можно порана фаза. Токму затоа инсистираме да се прават ХИВ тестови“ истакна д-р Татјана Станимировиќ, началник на одделот за епидемиологија.

Д-р Станимировиќ потенцираше дека бесплатни тестови се прават и во Прилеп, а при тестирањето максимално е запазена дискрецијата и анонимноста на лицата.

„Во нашата институција со години секојдневно работи советувалиште за сексуално преносливи болести и за сексуално и репродуктивно здравје. Во советувалиштето може да се добијат совети и се врши бесплатно тестирање. Тестовите се со 99% сигурност и многу брзо се соопштува резултатот. Затоа апелираме секој оној што смета дека бил изложен на некој ризик, да дојде и да направи тестирање“, додаде Станимировиќ.

Едукатори од Центарот за јавно здравје вчера одржаа трибина со учениците од СОУ „Ѓорче Петров“, а едукативни предавања дополнително ќе се одржат во сите основни и средни училишта од градот.

Инаку во Прилеп последните години забележан е тренд на пораст на заболени од ХИВ/СИДА. Од првиот регистриран случај од 1991 година досега инфицирани се 16 мина, а 6 од нив регистрирани се последните 2 години. Тројца новоинфицирани се откриени годинава и тројца минатата 2016 година.

Надлежните од Центарот за јавно здравје во Прилеп, може да се контактираат на тел. броеви: 075-353-801 и 076-475-747.

Како што акцентираат од Центарот, анонимноста при тестирањето е максимално загарантирана.